Өмірбаян
Жеңісбек Мәуленқұлов — 1947 ж. Түлкібас ауд. Жазықкешу (Корниловка); агроном-экономист, Түлкібас ауданының әкімі (1995–98), ОҚО халықты жұмыспен қамту департаментінің директоры, «Құрмет белгісі», экономика ғыл. кандидаты (фото)
«Жаныс-Байыс шежіресі» (2009), 173-бет:
ЖЕҢІСБЕК МӘУЛЕНҚҰЛОВ – 1947 жылы Оңтүстік Қазақстан облысы Түлкібас ауданының Жазықкешу (Корниловка) ауылында туған. Қазақ мемлекеттік ауыл шаруашылығы институтын агроном-экономист мамандығы бойынша 1970 жылы, Алматы жоғары партия мектебін 1986 жылы бітірген. 1970–1972 жылдары әскер қатарында қызмет атқарған. Бөген аудандық ауыл шаруашылығы басқармасында аға агроном, аудандық партия комитетінің нұсқаушысы, бөлім меңгерушісі. 1980–1987 жылдары Шымкент облыстық партия комитетінің нұсқаушысы, бірінші хатшының көмекшісі, қаржы-шаруашылық бөлімнің меңгерушісі қызметтерін атқарды. 1990–1992 жылдары облыстық атқару комитетінің бөлім меңгерушісі, облыстық Кеңестің іс басқарушысы, 1992–1995 жылдары облыс әкімі аппаратының іс басқарушысы, 1995–1998 жылдары Түлкібас ауданының әкімі, облыс әкімі аппараты басшысының орынбасары, қаржы-шаруашылық бөлімінің меңгерушісі болып істеді. 1999 жылғы тамыз айынан Оңтүстік Қазақстан облысы халықты жұмыспен қамту және әлеуметтік бағдарламалар департаментінің директоры. «Құрмет Белгісі» орденімен, «Ерен еңбегі үшін», «Тың жерлерді игергені үшін», «Астана» медальдарымен марапатталған. Отбасында зайыбы, үш перзенті, төрт немересі бар. Экономика ғылымының кандидаты. Жеңісбек Мәуленқұлұлы – парасатты, салмақты, салиқалы азамат. Негізінен сөздің емес, істің адамы. Нақтылықты, жауапкершілікті, тура айтқанды, талапшылдықты, тәртіпті биік қояды. Ел бірлігін сақтап, қазақтың игі жақсыларын жарыққа шығаруға еткен еңбегі көңілге толтырып айтарлық.
Әкесі туралы естелігінен (172-бет): «Мен әкем жайлы әңгімені оның қатарластарынан, бірге қызмет атқарған әріптестерінен, апамнан, ағайын-туыстардан көп естідім... Әкемнің өз қолымен жазған өмірбаянын, анкеталық парақты және басқа да құжаттарды тапқанымда әкем қайта тірілгендей, арқамнан ауыр жүк түскендей күй кештім... Өйткені, мен әкемнен өте жас шағымда, небәрі бір жасымда айырылып қалдым...» – дейді облыстық халықты жұмыспен қамту басқармасының бастығы Жеңісбек Мәуленқұлұлы. (Әкесі Мәуленқұл Жолымбекұлы туралы толық мақала – 171–172-беттер.)
Шежірені құрастыруға қатысуы: Шымкент атырабындағы Байыстардың шежіресін Ә. Шығынбаев, Б. Есімбековпен бірге дайындап ұсынған (кіріспе); құрастырушылар алқасының байланыс адамы (241-бет); шежіренің жарық көруіне қаржылай қолдау көрсеткен азаматтардың бірі (264-бет).