Өмірбаян
— Жаныс-Байыс шежіресі (2009), 44-бет —
КӨЛБАЕВ ҚҰРМАНБАЙ – 1912 жылы Түлкібас ауданы Көкбұлақ ауылдық кеңесінде (қазіргі Көкарық ауылы) туған. Шымкент педагогикалық институтының подкурсын бітіріп, физика, математика пәндерінен сабақ бере жүріп, Қызылорда пединститутын сырттай бітірген. Сөйтіп, Көкарық ауылынан бірінші жоғары білімді мұғалім-математик атанған. Түлкібас ауданының Высокое, Куйбышев, Балықшы елді мекендеріндегі мектептерде өз мамандығы бойынша сабақ берді. 1942 жылдан 1944 жылға дейін Ұлы Отан соғысында, Белгород бағытында қан майдандарға қатысты. 1944 жылы ауыр жарақаттан кейін Саратов қаласында госпитальде емделіп, елге қайтты. 1943ж. “За отвагу”, 1948ж. “За доблестный труд” медальдарымен марапатталған. 1946 жылдан компартия мүшесі болды. Өнерсүйгіш, ауыл арасында ойын-сауық ұйымдастыруға бейім, домбыра, қобызда еркін ойнай білетін, Балықшы орта мектебіндегі пианинода ойнайтын екі адамның бірі еді. Қ.Көлбаевтан тәлім-тәрбие, дәріс алғандардан тек Көкарық ауылының өзінен 3-ғылым кандидаты шықты, ал Балықты орта мектебінде дәріс алғандары (1957 жылға дейін) ішінде олардың саны 20-дан асады.